പുകവലി, അതിലെ ചേരുവകൾ… അമ്പമ്പോ!

ഊതിയാൽ പറന്നുപോകുന്ന, ഒന്നുമുതൽ ഒന്നരഗ്രാം വലിപ്പം വരുന്ന ഒരു ചെറിയ സിഗരറ്റ്, കെമിക്കലുകളുടെ ഫാക്ടറി ആണെന്നുപറഞ്ഞാൽ… Deadly truth about cigarettes and tobacco addiction.

പുകവലി: വിപത്തിൽ ഒന്നാമൻ?

സമൂഹത്തെ കാർന്നുതിന്നുന്ന ലഹരിയെന്ന വിപത്തിനെതിരായി ഒട്ടനവധി സംഘടിത പ്രവർത്തനങ്ങൾ നടന്നുകൊണ്ടിരിക്കുകയാണ്. ചുറ്റുപാടും ലഹരിയാസക്തി കൂടിവരുന്ന ഇന്നത്തെ സാഹചര്യത്തിൽ ചെറുപ്പക്കാരെയും കുട്ടികളെയും കേന്ദ്രീകരിച്ച് നടത്തുന്ന ഇത്തരം ലഹരിവിരുദ്ധ പ്രചാരണങ്ങൾ തീർച്ചയായും അഭിനന്ദനമർഹിക്കുന്നു.

നമുക്ക് ചുറ്റും ലഹരികളും വിഷങ്ങളും അനവധിയാണ്. അതെല്ലാം ഒരു ചെറിയ ലേഖനത്തിലൂടെ പറയാൻ കഴിയില്ല. തൽക്കാലം പുകവലി, പുകയില്ലാത്ത പുകയില ഉപഭോഗം, മദ്യം, മയക്കുമരുന്നുകൾ എന്നിവയെക്കുറിച്ച് ചിന്തിക്കാം.

ഏറ്റവും പ്രശ്നക്കാരനായ ലഹരി, പുകവലിതന്നെയാണ് എന്നാണെന്റെ പക്ഷം. മറ്റുള്ളവരും വലിയ പ്രശ്നക്കാർ തന്നെ. പുകവലി 100 ആണെങ്കിൽ മറ്റുള്ളവ 99…

പുകയില ഉപയോഗത്തെ സംബന്ധിച്ച് നിയമപ്രശ്നങ്ങളും എതിർപ്പുകളും കൂടിനിന്ന 1990 കൾക്ക് ശേഷം “സ്വീകാര്യവും ആകർഷകവുമായ രൂപത്തിൽ നിക്കോട്ടിൻ വിതരണം ചെയ്യുന്നതിനുള്ള ഒരു മെഡിസിൻ അഡ്മിനിസ്ട്രേഷൻ സിസ്റ്റം” എന്നാണ് നിർമ്മാതാക്കൾ സിഗരറ്റിനെ വിശേഷിപ്പിച്ചത്. വിരോധാഭാസം എന്നല്ലാതെ…

പുകയില രഹസ്യങ്ങൾ

ബീഡിയും, സിഗാറും, ഹുക്കയും (പൈപ്പ്) സിഗററ്റിനെക്കാൾ വളരെ കൂടിയ അളവിൽ ചില അപകടകാരികളായ സംയുക്തങ്ങൾ ശരീരത്തിലേക്ക് എത്തിക്കുന്നുണ്ട് എന്നതിനാൽ കൂട്ടത്തിൽ ചെറിയവനായ സിഗരറ്റിനെ ഉദാഹരണമായി എടുത്തിരിക്കുന്നു. ട്രഡീഷണൽ സിഗാറിലും, ബീഡിയിലും, ഹുക്കയിലും (പൈപ്പിലും) ഫിൽറ്റർ ഇല്ലാത്തത് ലഹരിയെ കുറേക്കൂടി വിഷമയം ആക്കുകയാണ് ചെയ്യുന്നത്. ഫിൽറ്റർ ഉള്ളതുണ്ട്, വലിയ കാര്യമൊന്നുമില്ല…

സിഗരറ്റിൽ പ്രധാനമായുള്ള ഭാഗം അതിനകത്തുവരുന്ന ടുബാക്കോ (പുകയില) ആണെന്ന് നമുക്കറിയാം. ഏകദേശം എഴുപതോളം തരത്തിലുള്ള പുകയിലകൾ ഇന്ന് പ്രചാരത്തിൽ ഉണ്ട്. അതിൽ ബ്രൈറ്റ് ലീഫ്, ബർളി, ടർക്കിഷ് മുതലായവക്ക് നല്ല പ്രചാരമുണ്ട്. എന്നാൽ സ്വതവേ അപകടകാരിയായ പുകയില മാത്രമല്ല സിഗരറ്റിൽ ഉള്ളത്. ടുബാക്കോ നിർമ്മാണത്തിലെ ഉപ ഉൽപ്പന്നങ്ങളും ചെലവ് കുറയ്ക്കുന്നതിന്റെ ഭാഗമായി സിഗരറ്റിൽ ചേർക്കാറുണ്ട്.

പുകയില പ്രോസസ്സ് ചെയ്ത് അതിന്റെ പ്രധാനഭാഗമായ അരിഞ്ഞ ഇലയുടെ കൂടെ, അതിന്റെ തണ്ടും, പൊടിയും എല്ലാം ചേർക്കപ്പടുന്നു. എന്നാൽ ഇവ നേരിട്ട് ചേർക്കുകയല്ല, വീണ്ടും പ്രോസസ്സ് ചെയ്ത്, മറ്റു കെമിക്കലുകളുമായി സംയോജനം നടത്തിയാണ് ചേർക്കുന്നത്. 1960 കളിൽ 1.03 കിലോഗ്രാം പുകയിലകൊണ്ട് 1000 സിഗരറ്റാണ് നിർമ്മിച്ചിരുന്നതെങ്കിൽ, ഇന്ന് 0.41 കിലോഗ്രാം കൊണ്ട് അത്രയും സിഗരറ്റ് നിർമ്മിക്കാം…

സിഗററ്റിലെ മറ്റുചേരുവകൾ

ഇന്ന് വാണിജ്യപരമായി ലഭിക്കുന്ന മിക്ക സിഗററ്റുകളിലും പുകയിലയുടെ കാഠിന്യം അറിയാതിരിക്കാൻ പലതരം പഞ്ചസാരയും ചേർക്കാറുണ്ട്. പഞ്ചസാര ഉരുകുമ്പോൾ (സ്‌മോക്ക് ചെയ്യുമ്പോൾ ഷുഗർ കാരാമലൈസ് ആകുന്നില്ല) അസറ്റാൽഡിഹൈഡ്, ഫോർമാൽഡിഹൈഡ്, അക്രോലിൻ, അസെറ്റോൺ, 2-ഫ്യുറാൾഡിഹൈഡ് എന്നീ കെമിക്കലുകൾ ആണുണ്ടാകുന്നത്.

ലൈറ്റ്, മീഡിയം, ഹെവി എന്നൊക്കെ സിഗററ്റിനെ പറയാറുണ്ട്. നിക്കോട്ടിന്റെയും ടാറിന്റെയും അളവുകളിലെ ക്രമീകരണം കൊണ്ടുമാത്രമല്ല, കൂടുതൽ തുളകൾ ഉള്ള പുറം പേപ്പറും, വായുസഞ്ചാരം കൂടുതൽ അനുവദിക്കുന്ന ഫിൽറ്ററുകളും കൂടിയാണ് ആണ് ലൈറ്റും, മീഡിയവും ഒക്കെ തീരുമാനിക്കുന്നത്. ഇത്തരം മൈൽഡ് അല്ലെങ്കിൽ ലൈറ്റ് സിഗരറ്റുകൾ സുരക്ഷിതം ആണെന്ന് പുകവലിക്കാരെ തെറ്റിദ്ധരിപ്പിക്കാൻ സാദ്ധ്യതയുള്ളതിനാൽ ഇന്ന് പല രാജ്യങ്ങളും ഈ ഐഡിയകൾ ബാൻ ചെയ്തുകഴിഞ്ഞു.

സിഗരറ്റിലെ 600 ചേരുവകളും സിഗരറ്റ് പുകയിലെ 7000 കെമിക്കലുകളും

ഒരു സിഗരറ്റിൽ, അതായത് അതിലെ ടുബാക്കോഭാഗത്ത് (പുകയില) ഏകദേശം 600 ഓളംചേരുവകൾ ആണുള്ളത് എന്ന് വിവിധ പഠനങ്ങൾ സൂചിപ്പിക്കുന്നു. കമ്പനികളുടെ ഫോർമുലകൾ, ഫ്‌ളേവറുകൾ, മാർക്കറ്റ് എന്നിവ അനുസരിച്ച് എണ്ണം വ്യത്യാസപ്പെടാം. Chemistry and Toxicology of Tobacco and Cigarette Smoke എന്ന രീതിയിലുള്ള പഠനങ്ങൾ ധാരാളം ലഭ്യമാണ്. ഈ ചേരുവകളിലൊന്നാണ് സ്വാഭാവികമായുള്ള പുകയില. ഈ പുകയിലയിൽ മാത്രം 2500 ഓളം വിവിധ കെമിക്കൽ സംയുക്തങ്ങൾ പ്രകൃത്യാലുണ്ട്. അപ്പോൾ ഈ 600 ഓളം ചേരുവകൾ ഒന്നിച്ചാലോ…

സിഗരറ്റ് കത്തിക്കുമ്പോൾ അതിന്റെ പുകയില ഏഴായിരത്തോളം കെമിക്കലുകളാണ് പുറത്തേക്ക് വിടുന്നത്, അതായത്, നാം അകത്തേക്ക് വലിച്ചുകയറ്റുന്നത്. DNA യ്ക്ക് വരെ തകരാറുകൾ ഉണ്ടാക്കുന്നവ. കുറേയധികം കെമിക്കൽ ഭാഗങ്ങൾ ചാരമായും മാറുന്നു. സിഗരറ്റിൽ ഉള്ളതിൽ എഴുപതോളം കെമിക്കലുകൾ കാർസിനോജനുകളാണ്, കാൻസർ ഉണ്ടാക്കുന്നവ എന്നർത്ഥം. പോളിസൈക്ലിക് അരോമാറ്റിക് ഹൈഡ്രോകാർബൺസ് (PAHs ഗ്രൂപ്പ്), ടുബാക്കോ സ്പെസിഫിക് നൈട്രോസമൈൻസ് (TSNAs ഗ്രൂപ്പ്), അരോമാറ്റിക് അമൈൻസ് (ഗ്രൂപ്പ്), ആൽഡിഹൈഡ്സ് (ഗ്രൂപ്പ്), വോളാറ്റൈൽ ഓർഗാനിക് ഹൈഡ്രോകാർബൺസ്(ഗ്രൂപ്പ്) മുതലായവ ഉദാഹരണങ്ങൾ.

ക്രോമിയം, കാഡ്മിയം, കോപ്പർ, സിങ്ക്, ബെറിലിയം, നിക്കൽ എന്നിങ്ങനെ പല ലോഹങ്ങളും സിഗരറ്റിൽ ഉണ്ട്. സിഗരറ്റ് ചാരത്തിലാണ് ഇവ കൂടുതലും കാണപ്പെടുന്നതെങ്കിലും ഇവയുടെ പുകരൂപം ശരീരത്തിനുള്ളിലേക്ക് കടക്കും.

മറ്റുള്ള കെമിക്കലുകളിൽ പലതും വിഷവാതകം ആണ് വമിപ്പിക്കുന്നത് എന്ന് കണ്ടെത്തിയിട്ടുണ്ട്. നിക്കോട്ടിൻ, കാർബൺ മോണോക്‌സൈഡ്, അമോണിയ, ബെൻസീൻ, ബ്യൂട്ടെയ്ൻ, ഹൈഡ്രജൻ സയനൈഡ്, , ടാർ (ഗ്രൂപ്പ്)… പേരുകൾ പറയാൻ നിന്നാൽ…

പുകയില ശരീരത്തെ എങ്ങനെ നശിപ്പിക്കുന്നു. Deadly truth about cigarettes and tobacco addiction.

സിഗററ്റിലെ നിക്കോട്ടിൻ ചോരയിലൂടെ നിമിഷങ്ങൾക്കുള്ളിൽ തലച്ചോറിൽ എത്തും. നിക്കോട്ടിൻ അഡ്രീനൽ ഗ്രന്ഥികളെ ഉത്തേജിപ്പിക്കുകയും അഡ്രിനാലിൻ പുറത്തുവിടുകയും ചെയ്യുന്നു. നിക്കോട്ടിൻ ഹൃദയമിടിപ്പ്, രക്തസമ്മർദ്ദം, ശ്വസന നിരക്ക് എന്നിവയിൽ വർദ്ധനവിന് കാരണമാകും അതോടൊപ്പം രക്തക്കുഴലുകൾ സങ്കോചിക്കാനും, കട്ടിയാകാനും കാരണമാകുന്നു, ഇത് രക്തയോട്ടവും, ചർമ്മത്തിന്റെ താപനിലയും കുറയ്ക്കുന്നതിനൊപ്പം രക്തം കട്ടപിടിക്കൽ, ഹൃദയാഘാതം, പക്ഷാഘാതം എന്നിവയ്ക്കുള്ള സാധ്യത വർദ്ധിപ്പിക്കുകയും ചെയ്യുന്നു.

നിക്കോട്ടിൻ കാൽസ്യം ആഗിരണം ചെയ്യാനുള്ള ശരീരത്തിന്റെ കഴിവ് കുറയ്ക്കുന്നു, ഇത് ഓസ്റ്റിയോപൊറോസിസിനും ഒടിവുകൾ ഉണ്ടാകാനുള്ള സാധ്യത വർദ്ധിപ്പിക്കുന്നതിനും കാരണമാകും. പുകവലി പുരുഷന്മാരിലും സ്ത്രീകളിലും പ്രത്യുൽപാദനക്ഷമതയെ പ്രതികൂലമായി ബാധിക്കും. ജനനേന്ദ്രിയങ്ങളിലേക്കുള്ള രക്തപ്രവാഹത്തെ നിക്കോട്ടിൻ ബാധിക്കുന്നു, ഇത് പുരുഷന്മാരിൽ ഉദ്ധാരണക്കുറവിനും സ്ത്രീകളിൽ ലൈംഗിക പ്രവർത്തനം കുറയുന്നതിനും കാരണമാകും.

കാർബൺ മോണോക്സൈഡ് ഹീമോഗ്ലോബിനുമായി ബന്ധം സ്ഥാപിച്ച് കാർബോക്സിഹീമോഗ്ലോബിൻ രൂപപ്പെടുകയും രക്തത്തിന്റെ ഓക്സിജൻ വഹിക്കാനുള്ള കഴിവ് കുറയ്ക്കുകയും ചെയ്യുന്നു, ഇത് ടിഷ്യു ഹൈപ്പോക്സിയയിലേക്ക് നയിക്കുന്നു.

ശ്വാസകോശത്തിലെ അവശിഷ്ടങ്ങൾ പുറംതള്ളാൻ സഹായിക്കുന്ന ചെറിയ രോമം പോലുള്ള ഘടനയായ സിലിയയുടെ പ്രവർത്തനം മന്ദീഭവിക്കുന്നു. കുറച്ചുനാൾ നീണ്ടുനിൽക്കുന്ന പുകവലി ഇവയെ പൂർണ്ണമായും നശിപ്പിക്കുന്നു.

പുകയിലെ മറ്റു സംയുക്തങ്ങൾ മൂക്കിന്റെയും തൊണ്ടയുടെയും ശ്വാസനാളത്തിന്റെയും ആവരണത്തെ നശിപ്പിക്കുകയും ചുമക്കും കഫത്തിനും കാരണമാവുകയും ചെയ്യും..

ടാറും ചില രാസവസ്തുക്കളും മൂക്കിലെയും വായിലെയും ഞരമ്പുകളെ തകരാറിലാക്കുകയും രുചിയും മണവും തിരിച്ചറിയുന്ന കഴിവുകളെ നശിപ്പിക്കുകയും ചെയ്യും. ടാർ ഒട്ടിപ്പിടിക്കുന്ന വസ്തുവായി ശ്വാസകോശത്തിൽ അടിഞ്ഞുകൂടും.

പുകവലി ചർമ്മത്തിന് കേടുപാടുകൾ വരുത്തുകയും അകാല വാർദ്ധക്യം, ചുളിവുകൾ, മുറിവ് ഉണങ്ങൽ വൈകിപ്പിക്കൽ എന്നിവയിലേക്ക് നയിക്കുകയും ചെയ്യും.

സിഗരറ്റ് പുകയിലെ രാസവസ്തുക്കൾ കണ്ണുകൾക്ക് കേടുപാടുകൾ വരുത്തുകയും മാക്യുലർ ഡീജനറേഷൻ, തിമിരം, കാഴ്ച നഷ്ടപ്പെടൽ എന്നിവയ്ക്കുള്ള സാധ്യത വർദ്ധിപ്പിക്കുകയും ചെയ്യും.

കാൻസർ: പുകയിലയുടെ മറ്റൊരടയാളം. Deadly truth about cigarettes and tobacco addiction.

വലിച്ചുകയറ്റുന്ന പുക ഏറ്റവും കൂടുതൽ പണി ശ്വാസകോശത്തിനാണ് തരുന്നത്. ക്രോണിക് ഒബ്‌സ്ട്രക്റ്റീവ് പൾമണറി ഡിസീസ് (COPD), ബ്രോങ്കൈറ്റിസ്, എംഫിസെമ, ശ്വാസകോശ അർബുദം എന്നിവയ്ക്കുള്ള സാധ്യത വളരെയധികം വർദ്ധിപ്പിക്കാൻ ഈ പുക ഉത്തമമാണ്.

ശ്വാസകോശ അർബുദം മാത്രമല്ല, മൂത്രസഞ്ചി, ആമാശയം, പാൻക്രിയാറ്റിക് എന്നിവിടങ്ങളിൽ വരുന്ന കാന്സറിനും ഈ പുക കാരണമാണ്.

റേഡിയോആക്ടീവ് വസ്തുക്കൾ: പുകയിലയിൽ. Deadly truth about cigarettes and tobacco addiction.

ഇവയെല്ലാം കൂടി ശരീരത്തിനെ തകർക്കുന്നത് കൂടാതെ പൊളോണിയം 210, ലെഡ് 210 എന്നീ റേഡിയോആക്ടീവ് വസ്തുക്കളും സിഗരറ്റിൽ ഉള്ളതായി റിപ്പോർട്ടുകൾ കാണിക്കുന്നു. പുകയിലക്കുള്ള വളപ്രയോഗത്തിൽ നിന്നും, അന്തരീക്ഷത്തിൽ നിന്നുമാണ് ഈ വസ്തുക്കൾ ചെടിയുടെ ഇലകളിലേക്ക് എത്തിച്ചേരുന്നത്. അവിടെനിന്നും ശരീരത്തിനുള്ളിലേക്ക്. ശ്വാസകോശ അർബുദത്തിന്റെ മേജർ ഷെയർ ഇവിടെനിന്നുമാണ്.

സിഗരറ്റ് പേപ്പറും കെമിക്കൽ കൂട്ടായ്മയും

പുകയില കത്തിത്തീരുന്നതിന് മുൻപേ അതിനെ പൊതിഞ്ഞിരിക്കുന്ന പേപ്പർ കത്തിത്തീരാതിരിക്കാൻ ആ പേപ്പറും കെമിക്കൽ ട്രീറ്റ്മെന്റിന് വിധേയമാകും.സ്റ്റാറ്റിക് ബേണിങ് റേറ്റിന് വേണ്ടി അതിൽ ചേർക്കുന്ന സംയുക്തങ്ങളാണ്,കാൽസ്യം കാർബണേറ്റ്, സോഡിയം അല്ലെങ്കിൽ പൊട്ടാസ്യം സിട്രേറ്റ്, മറ്റ് ലവണങ്ങൾ എന്നിവ. പോളി വിനൈൽ ആൽക്കഹോൾ പശയായും ഉപയോഗിക്കുന്നുണ്ട്. ഇവയും അപകടകാരികൾതന്നെ.

സിഗരറ്റ് വലിക്കുമ്പോൾ അറ്റത്തുള്ള തീക്കനലിന്റെ ചൂട് 800 മുതൽ 900 ഡിഗ്രി സെൽഷ്യസ് ആണ്. വലിക്കാതിരിക്കുമ്പോൾ 400 മുതൽ 500 ഡിഗ്രിയും. അതാണ് സിഗരറ്റ് വെച്ച് പൊളിച്ചാൽ തേർഡ് ഡിഗ്രി പൊള്ളൽ ആകുന്നത്. ഈ ചൂടിലാണ് പുകയിലയും മറ്റു വസ്തുക്കളും ചാരവും പുകയും ആകുന്നത്… അപ്പോൾ പൊതിഞ്ഞിരിക്കുന്ന പേപ്പറും ഈ ചൂടിനെ അനുസരിച്ച് നിൽക്കണമല്ലോ.

സിഗരറ്റിന്റെ ഫിൽട്ടറും ബയോപ്ലാസ്റ്റിക് ആണ്. സെല്ലുലോസ് അസറ്റേറ്റ്. ഇതിന്റെ പൊടിയും ശ്വാസകോശത്തിലെത്തും. ഒരുവർഷം ലോകത്ത് 500,000 ലക്ഷം കോടി സിഗരറ്റ് ഫിൽറ്റർ, സിഗരറ്റ് ബട്ടുൾപ്പെടെ എറിഞ്ഞുകളയുന്നുണ്ട് എന്നും അവ അവസാനം ജലാശയങ്ങളിൽ എന് എത്തിച്ചേരുന്നതെന്നും റിപ്പോർട്ടുകൾ വന്നിട്ടുണ്ട്.

ബീഡിയും സിഗാറും: കൂടുതൽ അപകടകാരികൾ

ബീഡിയിലും, സിഗാറിലും ഒക്കെ ഈ പേപ്പറും ഫിൽട്ടറും ഇല്ല എന്ന വ്യത്യാസം മാത്രം. ബീഡിയിൽ പേപ്പറിന് പകരമായി ബീഡിയിലയും, സിഗാറിൽ പുകയില തന്നെയും ആണുള്ളത്. ഫിൽറ്റർ ഇല്ലാത്തതിനാൽ ഇവയിൽ നിന്നും സിഗററ്റിനെക്കാൾ നിക്കോട്ടിനും ടാറും കാർബൺ മോണോക്‌സൈഡും ശരീരത്തിലെത്തും. Less processed + Stronger + Unfiltered + deeper puffs – വിഷങ്ങൾ വരുന്ന വഴിയാണ്…

പുകവലിയെക്കുറിച്ച് ഇത്രമാത്രം. ആരെയും ഉപദേശിക്കാനില്ല… അവനവൻ തീരുമാനിക്കട്ടെ. മറ്റുള്ള ലഹരികളെക്കുറിച്ച് പിന്നാലെ എഴുതാൻ ശ്രമിക്കാം.

പുകവലി നിർത്തിയാൽ…

എത്രകാലം നീണ്ടുനിന്ന പുകവലി ആയാലും, ഉപേക്ഷിച്ച് ആദ്യദിവസം തന്നെ ഹൃദയമിടിപ്പും രക്തസമ്മർദ്ദവും കുറയാൻ തുടങ്ങും. ഓക്സിജൻ വഹിക്കാനുള്ള ശേഷി രക്തത്തിന് തിരികെകിട്ടും. രണ്ടുദിവസം കൊണ്ടുതന്നെ രുചിയും മണവും തിരികെകിട്ടും, നിക്കോട്ടിൻ ശരീരത്തോട് ബൈ പറയും. എന്നാൽ സിഗരറ്റ് വലിക്കാനുള്ള ആസക്തി കുറെനാൾകൂടി അലട്ടിക്കൊണ്ടിരിക്കും. പിടിച്ചുനിൽക്കണം. ഏകദേശം രണ്ടുമാസങ്ങൾകൊണ്ടുതന്നെ ശരീരം സ്വയം ക്ലീനിങ് പ്രവർത്തി നടത്തി ശ്വാസകോശത്തെ, സിലിയ ഉൾപ്പെടെ, തിരിച്ചു സാധാരണ നിലയിലാക്കും. വലിയ വലിക്കാരിലൊക്കെ ഹൃദ്രോഗ സാധ്യത, കാൻസർ സാധ്യത ഒക്കെ അഞ്ചാറുകൊല്ലം കഴിഞ്ഞേ മാറുകയുള്ളൂ.

ജയൻ കൂടൽ

Profile link: https://www.facebook.com/jayan.koodal.siju/

Summary: Deadly truth about cigarettes and tobacco addiction

Cigarettes, cigar, beedi despite their small size and seeming simplicity, are essentially chemical factories that inflict severe harm on the human body and society. Public health campaigns against substance abuse are gaining momentum, especially targeting youth, and deserve commendation. Among addictive substances, smoking remains one of the most dangerous, introducing not just nicotine but also thousands of harmful chemicals into the body. These include known carcinogens, toxic metals, and radioactive elements, many of which damage DNA, impair organ function, and increase the risk of cancer, heart disease, stroke, and reproductive disorders. The deceptive marketing of cigarettes as “light” or “mild” further misleads users into thinking they are safer, despite being equally harmful.

Modern cigarettes are crafted with processed tobacco mixed with chemical additives and sugars to mask the harshness, releasing nearly 7,000 toxic substances when burned. The heat at the burning tip can reach up to 900°C, releasing gases and particles that reach deep into the lungs. Filters made of bioplastics contribute to environmental pollution, with trillions of cigarette butts discarded annually. Despite these dangers, quitting smoking begins to reverse damage from the very first day. Within months, the body begins healing itself. The message is clear: the earlier one quits, the better the chance of reclaiming health and preventing irreversible harm.