കൂടൽ ശ്രീദേവീക്ഷേത്ര വനദുർഗ്ഗാ സ്തുതി!
Koodal Sree Devi Temple Prayer Song
ഭാഗം 1
കൂടൽപ്പുണ്യമണിമന്ദിരമതിൽ വാഴും,
കാടലർ ചൂടി വിളങ്ങും വനദുർഗ്ഗേ,
ചൂടറ്റും തണലായ്, കുളിർപെയ്തു നിൽക്കും,
കാന്താരവാടികാദേവതേ, വന്ദനം തായേ!
ഭാഗം 2
മിഴിയിണ കമലാമലദലചഞ്ചലം,
തിരുമുഖമോ ശരത്ചന്ദ്രബിംബ നിർമ്മലം,
കഴലുകൾ പാപകന്മഷമകറ്റീടും,
വഴിപിഴയാതെ നയിക്കേണം ഞങ്ങളെ!
ഭാഗം 3
അലിവൂറും കടാക്ഷം തൂകുന്ന തായേ,
ജീവിതപ്പാതയിൽ തണലേകുവോളേ, നിൻ,
പാടലശോഭ ചിന്തുന്ന പാദങ്ങളിൽ ഞാൻ,
വീഴുന്നു ദേവീ, ശരണം നീ, അംബേ!
ഭാഗം 4
മാനസപൂജാകുസുമങ്ങളിതാ നിൻ-
പൂഞ്ചേവടികളിലർപ്പിക്കുന്നേൻ നിത്യം,
ദീനദയാലോ, ദുരിതാന്ധകാരത്തിൽ,
ജ്ഞാനപ്രകാശമായ് തെളിഞ്ഞീടേണം നീ!
ഭാഗം 5
വാനവും ഭൂവുമഖിലചരാചരവും,
മാനിച്ചു വാഴ്ത്തുന്ന മായേ, മംഗളദേ,
ദാനമായ് നൽകുക ശാന്തിസൗഭാഗ്യങ്ങൾ,
മാനവജീവിതം ധന്യമാക്കീടേണം!
ഭാഗം 6
കൈങ്കര്യങ്ങൾ കൈക്കൊണ്ടരുളേണം,
ദീനർക്കെന്നും തുണയായ് ഭവിക്കേണം,
അഖിലാണ്ഡവും വാഴും പരാശക്തി രൂപേ,
അടിപണിയുമെന്നെ കാത്തീടണേ നിത്യം!
✍️ ജയൻ കൂടൽ
Profile link: https://www.facebook.com/jayan.koodal.siju/
Website: https://jkdrive.in/
അർത്ഥസംഗ്രഹം:
കൂടൽ ശ്രീദേവി ക്ഷേത്ര സന്നിധിയിൽ വാഴുന്ന, ചഞ്ചലമായ താമരയിതൾ പോലെയുള്ള മിഴികളും, ശരത്കാല ചന്ദ്രബിംബം പോലെ നിർമ്മലമായ മുഖവും, പാപങ്ങളെ അകറ്റുന്ന പാദങ്ങളോടും കൂടിയ വനദുർഗ്ഗാദേവിയോട്, ജീവിതവഴിയിൽ തെറ്റാതെ നയിക്കണമെന്നും, ദുരിതമാകുന്ന അന്ധകാരത്തിൽ ജ്ഞാനത്തിന്റെ വെളിച്ചമായി തെളിയണമെന്നും, ദീനരിൽ ദയ കാണിക്കണമെന്നും പ്രാർത്ഥിക്കുന്നു.
ആകാശവും ഭൂമിയും സർവ്വചരാചരങ്ങളും വാഴ്ത്തുന്ന മംഗളസ്വരൂപിണിയായ ദേവിയോട് മനുഷ്യജീവിതം ധന്യമാക്കുവാൻ ശാന്തിയും സൗഭാഗ്യങ്ങളും നൽകണമെന്നും, മാനസപൂജകൾ സ്വീകരിച്ച് ദുഃഖിതർക്ക് തുണയാകണമെന്നും അപേക്ഷിക്കുന്നു; അഖിലാണ്ഡം വാഴുന്ന പരാശക്തി എല്ലാവരെയും കാത്തുരക്ഷിക്കട്ടെ.
Summary: Koodal Sree Devi Temple Prayer Song
A prayer to Vanadurga Devi at Koodal Sreedevi Temple, whose eyes are like lotus petals and face like the autumn moon. The devotee seeks guidance, enlightenment in darkness, compassion for the poor, and blessings of peace and prosperity for a fulfilling life, asking the divine to accept offerings and protect all beings.
